IN VOLTA PARLAR CO I VENETI DE INDEPENDENSA

Fando volantinajo, ciacolando, tirando su firme e rancontrandome co xente de tute el caste, a pòso tiràr le sòme e concluxiòn so na sèrie de reasiòn, caxisteghe e tipolojìe. Sercarò de riasumervele drìo man.

La reasion pi tipega la xé:

SPARANSA co fràxe tipo: “magari”

SFIDUSA co fraxe tipo: “no i ne la darà mai”, “no ghe credo pi a gninte”, “no voto pi”

INCREDULITÀ co fraxe tipo: “xe inposìbile”

RASIXMO: co fraxe tipo: “io sòno terrone”

MENEFREGHIXMO: “mi so a posto a so in pensiòn”

CONTRARIETÀ co fraxe tipo: “non sono daccordo”

MURO: “no”

Caxo par càxo, vedemo el modo de rispondar a tute ste parsone e che tipolojìa le raprexenta:

1)SPARANSA co fràxe tipo: “magari”. I xè la majorànsa, xente ca ga pì de 50 àni, i xè co naltri, dopo do tre olte i ve dà la firma, anca sùito. I ga sòlo da pasàr la fàxe traumatega del discorso independentista, a breve i vostri.

2)SFIDUSA co fraxe tipo: “no i ne la darà mai”, “no ghe credo pi a gninte”, “no voto pi”. Dixighe ca la xènte la se suisida parche no la ga sparansa, parche la Lega la ghe ga cavà la sparansa. Parleghe de fede, ca xé la ciàve del suceso.

3)INCREDULITÀ co fraxe tipo: “xe inposìbile”. Parleghe de fede. I sogni i se realixa sa se ghe crede. On ca crede a la vìta eterna dopo la morte non pol no credar a na Venesia lìbara, xè gran pi fàsile e senplise. Deghe fidusa, incorajeli, pian pianeto i sarà co valtri.

4)RASIXMO: co fraxe tipo: “Io sòno terrone”. Rispondighe suito co na dimanda: “Vivìo in Veneto?”. Se sì, dixighe ca i xe Veneti e ànca lori i ga da partesipàr. El steso discorso el se fa co i foresti no italeghi (anca sa i xè pi verti e interesà). Veneto xè chi ca Veneto fà. Parlè ca si drio lotar insieme ai Sardi e Siculi e insieme lotemo pa star mejo pa delibararse de na italia opresiva. Sotolineghe ca i ladri no i xé solo a roma, ma a Vicensa a Venesia e ca el nostro projeto vol dir eliminar parasitixmo e caregari. No se tràta de contraporse solo contro roma fa fa la Lega, ma contro on sistema difùxo in tuto el regno.

5)MENEFREGHIXMO: “Mi so a posto a so in pensiòn”. Se trata de vèci 70-80 eni. Sigheghe drìo ca a breve no i ghe darà pi la pensiòn, par lori xè traumatego e vedarè ca dopo ona o do olte li vegnarà da valtri. Insinuè el dùbio de le so sertese, el rumarà da elo solo rento l’anemo.

6)CONTRARIETÀ co fraxe tipo: “non sono daccordo”.

Corighe drìo e feghe: “Par favor me intaresa sentir parchè”, scoltelo, felo parlàr e dopo spiegheve la conveniensa del projeto independentista, asionisti e non suditi, l’inutilità dei nasionalixmi otosenteschi, la flesibilità e forsa de stati piceneti, la formasiòn de on novo stato inte na europa sensa cunfini,……

In sto mòdo li metì in croxe e vien da la nostra….

7)MURO: “No”. Sto tipo de parsone i xè in jenare statali co livelo de nasionalixmo alto (preti, ofisiàl de l’exersito, majistrà, prefeti, notari, insegnanti e dipendenti pioveghi). Co sta xente xè inposìbile ogni forma de diàlogo. Li se demonstra aroganti, superbi in partigolar proporsionalmente al rango ca li gà rento la màchina burocratega taliàna. Asar perdar.

No existe prategamente pì xente ca la dìxe: “fa femoli sensa la italia”, “xe inposìbile sensa la italia”. Ghe xè cosiensa jeneralixà ca semo forti.

Parlè anca co marochi, albanixi, rumeni, i xe anca lori sitadini e veicoli ideolojeghi, no se tràta solo tiràr su firme, se tràta de tranxmetar on meme.

La Lega Nord la xè al sfasio inte la Venesia, i la òdia fin i so stisi adepti, parleghene mal sensa timori ve darà pi chance de diferensiarve e conchistàr la xente.

Le done le xè pi independentiste. Le xè pi responsabili parche le ga manco privileji.

Questa voce è stata pubblicata in Societa'. Contrassegna il permalink.